Campus kujallermut tikilluarit
Campus Kujallermut uummammik pisumik tikilluaqquneqarputit.
Ullorsiutini paasissutissat amerlasuut ilinniartuunermut tunngasut nassarineqarsinnaapput soorlu Campus Kujallermi ukiumut pilersaarummi pisussat pingaarutillit takuneqarsinnaapput.
Atuarfik 75-it missaanniittunik sulisoqarpoq – taakkunannga amerlanerit ilinniartitsisuullutik, aammali allaffeqarfeqarpoq, ineqarnermut nakkutilliisoqarluni, eqqiaasoqarluni, aserfal- latsaalisitsisoqarluni, suliffiullu ingerlalluarnissaa anguniarlugu, tamarmik suleqataalluarput.
400-it missaliorlugit amerlassusilinnik ilinniartuuteqarpugut, TNI-mut GUX-mut, Serviceøkonom-mut aammalu Issittumi takornarissanik angallassisartutut ilinniarnermut agguataarsimasunik. Inersimasunik pikkorissartitsinermik aamma ingerlataqarpugut.
Neriuutigaarput atuarfimmut, ineqarfinnut, illoqarfimmullu akuullualerumaartutit, taamaalillutit atuarfik najoruminartunngorsaaffigeqatigalugu. Campus Kujallermi sulisunit tamanit ilinniagaqalerninni pilluaqquneqarputit.
Neriuutigaarputtaaq Qaqortumi sunngiffimmi periarfissat peqataaffigalugit atorluarumaaritit. Sunngiffimmimi inuusoqatitit peqatigisarukkit, illoqarfimmi nutaami, inuunissat oqinnerulersissinnaagakku.
Ullorsiummi uani ilinniagaqarnermi sammiviit, allallu atuarsinnaavaatit, neriuutigaarpullu iluaqutaaginnaratik inuuniarnernut oqilisaataassasut. Soorlu takussagit, atuarfiup torersuunissaa paarilluagaanissaalu pingaartilluinnarparput, illillu taamatut isumaqarnissat aamma pingaaruteqarluinnarpoq. Atuarfik torersoq najoruminarneruvoq.
Immikkut nerisarfeqanngilagut, akuttunngitsumilli atuaqatigiit angalanissamut katersuiniarnerminnut atatillugu, qallersukkanik assigisaannillu, anitsiarfissuarni akiginiaasarput. Periarfissaqarporlu nutaarsiassanik atuarnissamut, soorlu aamma qarasaasiaq unnukkut sap. ak. naanerini atorneqarsinnasoq.Nipilersortarfik aammalu timigissartarfik B-18-miittut sap.ak. naanerini ilinniartut nakkutilliisut isumqatigiissuteqarfigalugit atorneqarsinnaapput. Kollegiani aappaluttuni Tasersuup eqqaaniittuni qajarissat aammalu qajat Tasersuarmi atugassat atorneqarsinnaapput, ukiakkullu sukuutserutit sisoraatillu atorneqarsinnaapput.
Nalorniguit aperiinnassaatit.
Anguniakkat
- Ilinniarnertuungorniarfimmik nukittuumik ilinniatuminut avatangiiseqartitsisumik pilersitsineq. Ilinniarnertuunngorniarfimmi sammiviit assigiinngitsut ersarissut
- Inuussutissarsiutinik ilinniartitsineq suliffeqarfiit inuussutissarsiortullu pisariaqartitaat aallaavigalugit naleqqussarneqarnissaat
- Niuernermut tunngasumik nangitsilluni ilinniartitaanermik pilersitsineq
- Perorsaanerup ineriartorneranut tunngasunik ilisimasanik siammarterivimmik pilersitsineq
- Kommune Kujalleq peqatigalugu paasissutissanik ilisimasanillu ingerlatitseqqiivimmik sullissivimmik pilersitsinissaq
- Ersarissumik uuttortarneqarsinnaasumillu ilinniartut avatangiisaanik ineriartortitsineq pitsanngorsaanerlu
Atuarfimmut tikilluarit, ajunnginnerpaamik kissaappatsigit ilinnialerninnilu angusaqarluarnissannik kissaappatsigit.
Steffen Lund
Forstanderi