Serviceøkonomi takornariaqarneq sammisaralugu
Service, Hospitality & Tourism Management
Ilinnut, inunnut kulturinullu nutaanut soqutiginnittumut, nunarsuarmik misigisaqarusuttumut aamma Kalaallit Nunaanni takornariaqarnermik ineriartortitseqataarusuttumut saaffiginnippoq. Ilinniakkami Takornarialerinermik Aqutsineq qitiutinneqarpoq aamma takornariaqarnermik inuussutissarsiutilinni aamma misigisassarsiortitsilluni inuussutissarsiutilinni siunissami sulisussanut piumasaqaatit naleqqussarneqarsimapput. Ilinniagaq ilinniagartuutut qaffasissuseqarpoq nunanillu tamalaanit akuerineqarluni.
Suliffimmi qaffakkiartornissamut periarfissat
Ilinniagaq atorlugu assigiinngitsuni atorfinittoqarsinnaavoq, soorlu takornarialerinermut pisortaq, sulisoq orniguffissanik suliaqartoq, suliniummut aqutsisoq, siunnersorti, nittarsaassinermik ataqatigiissaarisoq imaluunniit saaffiginnittarfimmi pisortaq. Una ilinniagaq atorlugu aamma imminut pisortarisinnaavutit.
Ilinniarneq
Ilinniagaq ukiut pingajuat avillugu sivisussuseqarpoq, suliffeqarfimmi nammineq toqqakkami marloriarluni suliffimmik misiliisoqassaaq kiisalu orniguffissanut imaluunniit takornarialerinermi tunisassianut attuumassuteqartunut paasisassarsiorluni angalasoqassaaq. Atuagarsornikkut ilinniartitsineq aamma takornarialerinerup silarsuaa paarlakaajaanneqassapput. Ilinniarnerup ingerlanerani suliniutit suliassallu akuerineqartussat saniatigut soraarummeernerit avataaneersut sisamat ingerlanneqassapput. Suliassaqarfinni assigiinngitsuni suliumaarputit suleqatiginnissinnaassallutillu.
Suliffimmik misiliineq
Ilinniartoq sinerissami imaluunniit nunarsuup ilaani suliffimmik misiliiffissaminik ujarlernissaminut periarfissaqarpoq. Taamaalillutit suliffimmi qaffakkiartorninni atorsinnaasannik attavigisartagaqalersinnaavutit.
Ilinniartitsissutit
- Takornarialerineq
- Nunarsuarmioqatinut attaveqarneq
- Aaqqissuussaaneq aqutsinerlu
- Periusissialerineq nittarsaassinerlu
- Suliffeqarfik avatangiiserisallu
- Inuiaqatigiit pillugit ilisimatusarnermi periutsit
- Piujuartitsineq
- Nutaaliorneq
Atuartitsineq
Oqalugiarluni ilinniartitsineq, klassimi ilinniartitsineq, eqimattatut sulineq suliniutinillu suliaqarluni ilinniarneq ingerlanneqassaaq. Suliassat kalaallinut tunngasut aamma suliatigut ajornartorsiutit aallaavigalugit ilinniartitsisoqassaaq. Ilinniartitsisut sivisunerusumik ingerlariaqqiffiusumi ilinniarsimasuupput aamma ukiuni arlalinni Kalaallit Nunaanni nunanilu allani attuumassuteqartumik inuussutissarsiuteqarnermik misilittagaqarput.
Takornarialerinermik Aqutsineq immikkut sammisaralugu
Immikkut sammisaqarnermi suliaqarfimmi uku sammineqassapput:
- Takornarialerinermut angalanermullu ilisarititsineq. Takornarialerinerup ineriartorneranik, takornarialerinermi tunisassianut, takornariartitsivinnut takornarialerinerup inuiaqatigiinnut pingaaruteqarnera aaqqissuussaaneralu ilinniartitsissutini itinerusumik paasisaqarfigiumaarpatit.
- Takornarialerinermi ineriartornerit. Ilinniartitsissummi matumani sullitaqarnissaq, inniminniinermi nassiussuinermilu aaqqissuussinerit, inatsit, avatangiisinut uppernarsaammik nalunaaqutsiineq kiisalu aaqqissugaaneq isumannaallisaanerlu pillugit ilisimasaqalissaatit.
- Takornariaqarneq inatsisilerinerlu. Takornarialerinermut tunngatillugu inatsisinik malittarisassanillu ilisimasaqalissaatit.
- Takornarialerinissamut pilersaarusiorneq misissueqqissaarnerlu. Ilinniartitsissummi matumamni pisortani oqartussatut takornariaqarnikkut ineriartortitsinermut, takornariartitseriaatsinut assigiinngitsunut, pilersaarusiornermi periaatsinut najukkamilu takornarialerinerup pingaaruteqassusianut tunngatillugu ilisimasaqalissaatit.
- Piujuartitsineq. Takornarialerinissamut pilersaarusiornermi piujuartitsinerup pingaaruteqassusia pillugu ilisimasaqarnerulissaatit.
- Nittarsaassineq nutaaliornerlu. Takornarialerinermut tunngatillugu nittarsaassinermi kampagneqarnernillu kiisalu takornarialerinermi tunisassiat atortullu ineriartornerannik misissueqqissaarsinnaanngussaatit paasinnissinnaanngussallutillu.
Serviceøkonomimut ilinniakkami ilinniartitsissutit nalinginnaasut aassigiinngitsut Kalaallit Nunaanni Danmarkimilu serviceøkonomitut ilinniarnernut tamanut atuuttut kiisalu ilinniartitsissutit immikkut ittut ilinniartitsissutigineqarput. Taamaattorli Kalaallit Nunaanni taamaallaat takornariaqarneq immikkut ilinniartitsissutitut toqqarsinnaavat.
Ilinniartitsissutit nalinginnaasut
- Nunarsuarmioqatinut attaveqarneq. Tuluttut, nunat allamiut oqaasii, kulturimik paasinninneq sullitanullu atassuteqarnerit
- Aaqqissuussaaneq aqutsinerlu. Sulisunik aqutsineq, suliffimmi teorii, sulisoqarnikkut aqutsineq inuttullu ineriartorneq
- Periusissialerineq nittarsaassinerlu. Aaqqissuussaasumik pilersaarusiorneq, nittarsaassineq, nutaaliorneq pitsaassutsimillu qulakkeerinninneq
- Serviceøkonomi. Aningaasaliineq, nissingersuusiorneq, naatsorsuutit, naatsorsuineq pitsanngorsaanerlu
- Suliffeqarfik avatangiiserisallu. Periaaseq, ileqqorissaarneq, inuussutissarsiut inuiaqatigiillu, sullissinermi teorii, inuussutissarsiutitigut inatsisilerineq
- Paasissutissiinermi teknologii. Atuinissamut periarfissat
Ineqarnermut tunngasut
Qaqortumi Campus Kujallermi atuagarsortoqartarpoq, tassani ilinniartut ineqarfiini nammineq ineeraqarlutit najugaqartinneqarumaarputit. Nammineq nerisassiortassaatit eqqiaallutillu.
Ilinniagaqarnersiutit
Kalaallisut qallunaatullu innuttaassusilinnut ilinniarneq akeqanngilaq. Ilinniarnissannut akuerineqaruit ilinniagaqarnersiuteqarsinnaatitaavutit. Ilinniagaqarnersiutit www.usf.gl -imi paasisaqarnerusinnaavutit.
Qaqugukkut Serviceøkonomimut qinnuteqartoqassava?
1. marts 2025 qinnuteqarnissamut killigitinneqarpoq aamma najukkanni Majoriaq aqqutigalugu qinnuteqaat tunniunneqassaaq.
Inatsisitigut piumasaqaatit
Tuluttut C-mik qaffasissusillip saniatigut ilinniagaqalernissamut piumasaqaatit uku naammassineqarnissaat piumasaqaatigaarput:
- Saqisutut saaffiginnittarfimmiutulluunniit inuussutissarsiornermi ilinniakkami erhvervsøkonomi C imaluunniit matematik C
- Pisiniarfimmiunngorniarluni imaluunniit allaffimmiunngorniarluni TNI-mi ilinniarnermi erhvervsøkonomi C imaluunniit matematik C
- Niuertarfimmi inuussutissarsiornermi ilinniakkami, niuernermut tunngatillugu allaffissornermi imaluunniit erhvervsøkonomi C imaluunniit matematik C
- Inuussutissarsiornermi ilinniakkami allami assingusumi erhvervsøkonomi B imaluunniit matematik B
- Ilinniarnertuunngorniarfimmi soraarummeersimaneq (GU, HTX aamma HHX), kiisalu erhvervsøkonomi C imaluunniit matematik C..
- Ilinniagaq assingusoq alla – Qaqortumi Niuernermik Ilinniarfimmit naleqquttutut nalilerneqaruit.
Qinnuteqartut ilinnialernissamut piukkunnartut Erhvervsøkonomi C-mi imaluunniit Matematik C-mi qaffasissusilimmik amigaatillit Campus Kujallermi ilinniarnissamut piareersarluni pikkorissarnermut peqataassapput.