Julemarked 2024
Servicemik inuussutissarsiuteqarnermut ilinniartut Campus Kujalliup ataaniittut, ukioq manna juullip niuerfiata aaqqissuunnissaanik suliaqarput.
Arfininngorpat, Niuernermik Ilinniarfimmi juullimut niuffatsitsinissaq 1990-kkunnili ileqquusoq, nuannarineqarluartoq, ingerlanneqassaaq.
Aallartinnerata oqaluttuassartaa tassaavoq, 2008-imi TNI-mi, hhx-imi Serviceøkonominngorniarlutillu ukioq siulleq ilinniartut aaqqissuussinerat iluatsilluarsimammat, tamannalu tunngavigalugu, ukiut tamaasa juullimut niuffatsitsineq ingerlanneqartalersimammat.
Juullimut niuffatsitsisarneq ilinniarnernut tunngasunut assigiinngitsunut iluaqutaavoq, soorlu ilinniarnermut atatillugu, paasisassarsiorluni angalanernut, suliffimmik misiliilluni misilittagaqarnernut aammalu siunissami sulinissani aningaasaliisussarsiornernut iluaqutaasorujussuusarmat.
Serviceøkonominngorniarlutik ilinniartut augustimi septemberimilu angalanissaminnut atatillugu, aningaasannanniarlutik aaqqissuussinerit piareersarlugit aallartereertarpaat; aammalu eqqugassanut aningaasaliisussarsiornerit piareersarlugit, aallartereertarlugit. Ukioq manna ilaatigut eqqugassanut ilaapput, angalanissamut gavekorti Travel by Heart Greenlandimit, Visit Greenlandimit Disco Linemillu tunniussaq.
Eqquiniaasitsinerup saniatigut, ilinniartut sociale medieni nittarsaanerni saqqummiisartussanik, ikuallattoortoqaratarsinnaaneranut nakkutilliisussanik perusuersartarfeqarnissallu pillugit, suliaqarlutik ingerlataqarput. Taakku saniatigut meeqqanut susassaqartitsinerit assigiinngitsut piareersarneqarput, ilaatigut soorlu init atuartitsiviit ilaat ”aliortukkanut illuliarineqarsimammata”.
Atuarfiup sinnera nuannersorujussuuvoq, init atuartitsiffiusartut tamarmik klasseqatigiiaanit juullerpalaartumik pinnersarneqarsimallutik.
Juullimut niuffatsitsineq illoqarfimmut tamarmut tunngasuusoq oqaatigineqartarpoq – Savaatilinnut aamma. Savaatillit piliaminnik nioqquteqartarput. Sorpassuarnik assigiinngitsunik assassukkanik sulianillu allanik nioqquteqartartut katillugit, 50-t missaanniittarput: Umimmaat qiviuinik nuersakkat, juullimut pinnersaatit, ujammit, tullequtit assigisaallu. Kaaffiunngilaq. Nerisassiat kissartut mamakujuit kagiliat iffiukkallu nioqqutaassapput.
Takornarialerineq pillugu apeqqutissaqaruit, mail una atorlugu, cak@cak.gl apeqquteqarsinnaavutit.
Kontaktoplysninger til skolen: Læs mere her!