PKU-24.05
Aqutsisutut inerikkiartorneq, modul 1 -3
ukiaq 2024, Qaqortoq
Peqataasussat: Kommune Kujallermi innuttaasut
Modul 1: 1. – 4. oktober 2024
Modul 2: 29. oktober – 1. november 2024
Modul 3: 10. – 13. december 2024
Imai:
- Thomas Test-ip ilisaritinnera aamma utertiffigitinneq
- Aqutseriaatsit nutaanngilisussaanngitsut (klassiske ledelsesformer)
- Attaveqaqatigiinneq
- Suliffeqarfiup kulturia – aamma ileqqut
- Sulianik agguaassineq
- Oqaloqatigiinneq ajornakusoortoq / Periaatsit
- Allannguiniarnermi aqutsineq
- Aaqqiagiinnginnermi iluarsiiniarneq
- Sulinermut kajumissuseqalernissaq pillugit teori-t
- Suleriaatsinik pitsanngorsaaneq – Leanimut ilisarititsineq
Pikkorissaanermi periaaseq:
Moduli ataaseq ullunik sisamanik sivisussuseqarpoq. Modulit akornanni suliakkerneqarnissaq naatsorsuutigineqassooq. Pikkorissaanermi saqquummiinnerit eqimattakkaarlunilu suleqatigiinnerit paarlakaajaarlutit pisarumaarput.
Oqaatsit:
Kalaallisut.
Piumasaqaatit:
Peqataarusullutit qinnuteqartut sulinerminik aamma aqutsinermi arlaatigut suliaqartuussaapput imaluunniit siunissami taamaalinissaanik piukkunneqarsimassapput, assersuutigalugu formandit, holdlederit, afdelingslederit assigisaallu.
Sivisussusaa:
3 x ullut sisamat, nal. 8.30 – 16.00.
Qinnuteqarneq: Kingusinnerpaamik 2. september 2024
Illoqarfigisanni Majoriaq aqqutigalugu nalunaartoqassaaq. Sullissisut (sagsbehandler) peqatigalugu qinnuteqarneq pissooq. Suliffeqaruit sulisitsisut peqatigalugu peqataaniarluni nalunaartoqarsinnaavoq. Qinnuteqarnermi nittartagarput aqqutigalugu www.cak.gl. immersugassaq atorlugu nalunaarneq pissooq.
Suliffeqaraani sulisitsisoq peqatigalugu qinnuteqarneq pissooq.
Kommune Kujallermi najugallit qinnuteqaataat akuerineqartut peqataaniarnerani angalanerat Qaqortumilu najugaqarnerat nerisaqarnerallu CAK-ip isumagissavaat.
Pikkorissarnermi ajunngitsorsiassat (kursusgodtgørelse)
Peqataasut ilinniagaqanngitsut pikkorissarnermi ajunngitsorsisinnaapput.
Peqataasut ilinniagallit peqataasinnaapput akeqanngitsumik, taakkuli ajunngitsorsiassaqanngillat.
Sulisitsisut / peqataasut suliffillit
Pikkorissartussaq pikkorissariaqquneqarnerup nalaani suliffeqaruni, taava Campus Kujalliup sulisitsisoq qinnuigaa pikkorissartup akissarsiani tigummiinnassagai.
Sulisitsisoq Campus Kujallermut akiligassamik nassiussisinnaavoq pikkorissarneq naammassippat. Ilisimatitsissutigineqassooq ullut peqataaffiit kisiisa akissarsissutigineqarsinnaammata.
Pikkorissarnermi suliffimmit akissarsiat tigummiinnanngikkaani ajunngitsorsiassanik pisoqarsinnaavoq.
Majoriaq / peqataasut suliffeqanngitsut, aalisartut/piniartut
Majoriaq suliffeqanngitsunut “sulisitsisutut” inissisimasinnaavoq. Taamaappat Campus Kujalliup pikkorissartup ajunngitsorsiassai Majoriamut tunniutissavai pikkorissartorlu Majoriamit ajunngitsorsiassani tigussavai. Majoriaq aamma Campus Kujalleq akunnerminni akiligassaq isumagissavaat.
Ajunngitsorsiassat ullut 14-ikkaarluni akissarsititsinermi ilaapput.
Pikkorissartut suliffeqanngitsut, pikkorissarnerullu nalaani suliffeqanngikkallarnermi pisortanit ikiorsiissutinik pisartagallit, pisartagartik tigummiinnassavaat, imaappoq ajunngitsorsiassat (kursusgodtgørelse) atuutissanngillat.
Pikkorissartoq aalisartuuguni / piniartuuguni ajunngitsorsiassaqarsinnaavoq (kursusgodtgørelse), taakku ulluni pikkorissarfiusuni isertitassaagaluanik annaasaqarnermut matussusiisussaapput.
Nammineq inuussutissarsiortut
Ajunngitsorsiassat isertitatut B-tut tunniunneqassapput. Taamaattumik pikkorssartup nammineq skat-eernissani isumagissavaa.
Ajunngitsorsiassat tunniunneqassapput pikkorissarsimasoq akiligassamik (faktura) Campus Kujallermut nassiussereerpat.
Ajunngitsorsiassap annertussusaa:
Ullormut 718 kr.