Issittumi misigisassarsiortitsilluni takornariartitsisartoq
Ilinnut takornarianik qaqqami sivisuumik sullissinissamut isumannaallisaanermut, ilisimasanut, ingerlatitseqqinnermut, kiffartuussinermut – aamma nuannersumik misigisaqartitsinissamut sammisumut soqutiginnittumut ilinniagaq.
Ilinniakkami ilaatigut nunap naasui aamma nunap ilaata uumasuit sammissavatit; asimi kulturi, takornarniartitsinermi teknik, qaqqami ikiueqqaarneq (Wilderness First Responder), sermimi ingerlaarneq, tuluttut aamma kulturimik paasinnittaaseq.
Ilinniartitsineq ilinniaqatigiinnik atuartitsinikkut, saqqummiisoqarneratigut workshopernikkut aamma sungiusarnikkut “on location” ingerlanneqassaaq. Ilinniarnerup 20 procentiata missaa – Imarsiornermik Ilinniarfik suleqatigalugu umiatsiamik annerpaamik 12-nik ilaasoqarluni ingerlatsisinnaanermut sumiissusersiorsinnaanermik uppernarsaatitaarnissamut ilinniarnerussaaq.
Takornarniartitsisartut ilinniarsimasut takornarianik eqimattanik (amerlanerpaamik 12-nik) kulturinit assigiinngitsuneersunit ulluni arlalinnik ingerlatsisinnaanerat ukkatarineqarpoq.
Ilinniarneq ukiup affaata missaanik sivisussuseqarpoq, aggustimi aallartilluni decembarimilu naammassilluni. Atuartitsinerup skemalersukkap saniatigut pinngortitami sungiusarneqassaatit. Qaammatit marluk siulliit ilinniarneq Avannaani pissaaq (ukioq manna Ilulissani Kangerlussuarmilu), naggataalu Kujataani (Qaqortumi allanilu).
Issittumi misigisassarsiortitsilluni takornariartitsisartoq qaqugu qinnuteqarfigineqassava?
Issittumi Takornariartitsisartutut qinnuteqarnissamut piffissaq killiliussaq tassaavoq 1. Marts 2025 – Majoriaq aqqutigalugu qinnuteqartoqassaaq. Qinnuteqarnermut tunngatillugu paasisaqarnerorusukkuit ilinniarfimmi pisortaq Iddimanngiiu Bianco uunga ib@cak.gl attaveqarfigisinnaavat.
Akuerineqarnissaq
Uku tulliuttut naammassisimagukkit 1. Marts 2025 sioqqullugulu qinnuteqaruit, akuerineqarnissannut inatsisitigut pisinnaatitaaffeqarputit. Tassa imaappoq, akuerineqartussaavutit.
Adventure Guidetut ilinniakkamut imaluunniit tassani modulinut ataasiakkaanut akuerineqarnissamut, qinnuteqartup minnerpaamik ilinniakkanik makkuninnga qaffasissusilinnik naammassinnissimaneranik piumasaqaatitaqarpoq:
- Ilinniarnertuutut soraarummeerneq (GU, GUX, HHX, HTX, Stx, imaluunniit assingusumik)
- Inersimasut ilinniagaat ingerlariaqqiffiusoq attuumassuteqartoq (VVU), Kalaallit Nunaanni NI-2
- Ingerlariaqqiffiusumik ilinniagaq sivikinnerusoq (KVU) – Serviceøkonomi
- Inuussutissarsiornermik ilinniakkat soorlu TNI allallu, tuluttut C-mik qaffasissusillit.
- Qinnuteqartut Issittumi Takornariartitsisartutut (Arktisk Guide) ilinniakkamik naammassinnissimasut
Ilinniartoqarfik qinnuteqartunik ilinniakkamik akuersissuteqarnissamut piumasaqaataasunik qulaani taaneqartunik naammassinnissimanngitsunik akuersisinnaavoq, kisianni ilinniarnerup tungaatigut piumasaqaatinik taakkununnga assingusinnaasunik aalajangersimasumik naliliisoqarnera tunngavigalugu.
Ilinniagaq timikkut tarnikkullu piumasaqaaterpassuaqarpoq, taamaattumik qinnuteqartut timimikkut tarnimikkullu innarluuteqartut akuerisinnaanngilagut.
Akuerineqassagaanni kalaallisut tuluttullu minnerpaamik C-mik qaffasissusilimmik misilitsissimasariaqarpoq. Ilinniartut allakkanik kalaallisut tuluttullu minnerpaamik Den Europæiske Sprogportfolio naapertorlugu B2-mik qaffasissusilimmik atuarsinnaanissaa naatsorsuutigineqarpoq. Qinnuteqartut akuerineqarnissamut piumasaqaatinik naammassinninngitsut tamarmik akuerisaanissamut misilitsinnermik anguseqqaassapput, tamatuma tuluttut kalaallisullu B2-mik qaffasissusilimmik atuarsinnaanerannik qulakkeerinnittussamik.
Ilinniarneq aggustimi 2025-mi aallartissaaq, decembarimilu 2025-mi naammassissalluni.
Arktisk Adventure Guide 2024-mi ilinniarnermut pilersaarut atuaruk