Campus Kujallermi atuartitseriaatsimut tunngatillugu anguniakkat (eqikkagaq)
Aallertigut Campus Kujalleq-ip Pædagogisk vision-iata naammassisaa (ammarlugu nutaamik vindue-mi)
Campus Kujallermi atuartitseriaatsimut tunngatillugu anguniakkat pædagogikkimut anguniakkanullu attuumassuteqarput, taamaalillutik tunngaviit assigiinngitsut ilinniarfiup suliassaanut tamanut tunngatillugu ilinniarnermut attuumassuteqarput. Tamatuma peqatigisaanik ulluinnarni atuartitsinermi tunngavissanik eqqortitsinissamut atatillugu naleqqatut atornissaannut takussutissiisinnaapput.
Inuit ataasiakkaat ilinniarnerat
Ataasiakkaat ingerlaavartumik ilinniarnissaat aamma isumaqarluartumik sammisaqarnissamut ineriartornissamullu pissusissamisoortumik kajumissuseqarnissaat Campus Kujalliup atuartitsinermi anguniagaraa. Campus Kujallermi aamma najugaqarfigisami inuiaqatigiinni inuit oqartussaaqataaffigisaanni ataasiakkaat tamarmik Inersimalernissaannut aamma nammineq akisussaassuseqarlutik inuunermik ingerlatsinissaannut tunngatillugu tunngaviusumik piginnaasaqarnissaat piginnaaneqarnissaallu atuartitsinermi anguniakkanut tunngatillugu pingaartitani qitiupput. Ilungersornerup nalaani pingaartitat siuliani eqqaaneqartut eqqarsaatigalugit Campus Kujallermi sulisut atuartunik kajumissaarissapput.
Atuartut ilinniartitsisullu
Inersimalernissaannut, namminersulernissaannut isornartorsiuisumik eqqarsartaaseqalernissaannut tunngatillugu sapinngisamik qaffasinnerpaamik suliamut pikkorissuseqalernissaat ineriartornissaallu Campus Kujalliup atuartitsinermut tunngatillugu anguniagaanut ilaavoq. Suliassat tungaatigut ineriartornissamut aamma oqartussaaqataanermi ingerlatseriaatsimut tunngatillugu tapersersuinissaq inerisaanissarlu ilinniartitsinermi siunertaapput, tassani pingaarnertut ilinniartunut piumasssuseqalersitsisumik ilinniartitsinikkut taamaaliortoqassaaq.
Ilinniartitsisut tamarmik qanoq sivisutigisumik sulisimanerat massakkullu piginnaasaat apeqqutaatinnagit ulluinnarni ilinniartitsisutut sulinerminni ingerlaavartumik immikkut ilisimasatik tunngavigalugit assigiinngissitaarnerutitsinissamik piginnaasaqarnerulernissamillu anguniagaqartarnissaat anguniagaavoq.
Ilinniartitsisut sulisullu allat
Atorfillit tamarmik piginnaasaqarnerulernissamut ilisimasaqarnerulernissamullu tunngatillugu anguniagaqarusussuseqarnissaannut anguniakkat piviusunngortinniarlugit aqutseriaatsinik attaveqaqatigeeriaatsinillu sunniuteqarluartunik ineriartortitsisoqassaaq, taakku tapertaasunik, inerisaataasunik tunngavissiisunillu kajumissuseqalersitsissapput.
Atuartut sulisullu allat
Nalinginnaasumik sulisut atuartunut atuartitsinerminni atuartitsinermut tunngatillugu anguniakkat tunngavigissavaat, tassunga ilanngullugu oqalunnermi allannermilu erseqqissumik paasiuminartumillu attaveqaqateqarnissaq.
Atuartup ilinniarusussusaata siuarsarnissaa eqqarsaatigalugu ilinniartunik siunnersuineq kajuminnartuussaaq, tassani atuartoq sammisat apeqqutillu ilinniarnermut attuumassuteqartut pillugit aggiinnariaannaassaaq eqqartueqateqarlunilu.
Campus Kujalliup ilinniarfittut sapinngisamik peqanngitsoortarnerup annikinnerpaaffiunissaanik anguniagaqarpoq, tassani orniguttarneq suliakkiutigineqartunillu tunniussisarneq pineqarput. Atuartup ilinniarusussuseqarnerulernissaa anguniarlugu ilinniartitsisup atuartunik piumassuseqalersitsisumik ilinniartitsinerata aamma atuartarnissaanik tunniussassanillu tunniussisarnissaanik annerulersinnissap saniatigut allaffiup atuartut naligalugit naapittassavai aamma peqanngittarnerup tunniussisannginnerullu annertuallaarnerisa kingunerisinnaasaannik erseqqissumik paasitissavai.
Init aamma ilinniagaqarluni ataatsimoorfiusumi kulturi
Init aamma ilinniagaqarluni ataatsimoorfiusutigut atugassarititaasut orniginartuussapput aamma atuartup ilinniartitsisullu aamma sulisut allat ilinniarnissamut tunngatillugu piumassuseqalernissaannut isumaqarluartumillu sammisaqarnissaannut siuarsaataassapput.
Atuartitsinermi anguniakkat naapertorlugit init ataatsimoorfiusut tamarmik atuartunut ilinniartitsisunullu avatangiisit ilikkagaqarfiusinnaassapput. Ilinniartitseriaaseq pilersinneqarsimasoq unammillerniarlugu aamma ilinniartitsinermi nutaaliornissamut periarfissiiniarluni init nalinginnaasumik atuartitsinermut atorneqarneq ajortut atuartitseriaatsit nutaat nutaanillu pilersitsiffiusinaanissaat eqqarsaatigalugit iseruminartuussapput.
Campus Kujalleq avatangiiserisallu
Inuiaqatigiit massakkut siunissamilu pisariaqartitaat eqqarsaatigalugit
Campus Kujalleq tamaat isigalugu aaqqissuussaanikkut ammasuuginnarnissaa nutartertuarnissaalu atuartitsinermi anguniakkani qitiutipparput, taamaaliortoqarsinnaavorlu maligassaqqissumik ilisimasaqarfiunikkut aamma kinguneqarluartussamik avatangiisit suleqatiginerisigut.
Atuartut ingerlariaqqiffiusumik ilinniarfiit pillugit pitsaanerpaamik ilisimasaqarnissaat qulakkeerneqassaaq, taamaammat qaffasinnerusumik ilinniarfinnut attaveqarluarnerit nukittorsarneqassapput ineriartortinneqassallutillu.
Ilinniartitsisut sulisullu allat atuartitsinermut tunngatillugu suleqatigiinnerisa attatiinnarnissaanut nukittorsarneqarnissaannullu Campus Kujalleq siunniussaqarpoq, tassunga ilanngutissapput ilinniarfeqarfinnik attuumassuteqartunik, Kalaallit Nunaanni ilinniarfinnik aamma Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmik allaffissornikkut suleqateqarneq.
Torben Kure Markerimit, Campus Kujalleq, PhD, Ilinniagaqartunut tunngasuni Aqutsisumit suliarineqarpoq.