Augusta Egedep sulinera ulloq kingulleq
Augusta H. Egede, studievejleder, Campus Kujalleq
Augusta Egede ukiorpassuarni, ukiuni kingullerni Campus Kujallermi, sulereersimalluni, soraarninngortussanngormat, Campus Kujalliup naapippaa.
Ilinniartunut siunnersortinngorsimanermini aqqutigisimasai apeqqutigaavut.
”Qaqortotmiuuvunga, Alluitsup Paanili peroriartorlunga. 1975-mi Nuummi meeqqerinermut ikiortitut ilinniarpunga, Qaqortumi praktikkerlunga. Ukiuni marlunni Århusimi ukiorlu ataaseq Nuummi socialpædagogimut ilinniagaqarpunga. Tamatuma kingorna Maniitsumi ukiorpassuarni sulivunga. 1987-mi uiga Brugsen Qaqortumi atorfinippoq – taamaalilluta, Qaqortumut nuuppugut. Qaqortumut tikikkama, meeqqat- inuusuttullu angerlarsimaffianni sulivunga. Tamatuma kingorna Kommunemi taamanilu Namminersornerullutik Oqartussani sulillunga. Assigiinngitsunik suliaqartarpuna, soorlu angerlarsimaffinni ikiortinut aqutsisuunikuuvunga, meeqqerivimmilu pisortaanikuullunga. 2010-mi gymnasiet-mit saaffigineqarlunga aperineqarpunga, kollegie pædagogitut atorfinikkusunnginnersunga. Soqutiginartippara – taamaattumik oqarsinnaavunga, gymnasiet-mit piukkunneqarnera tunngavigalugu, GU-mi sulilersimallunga.”
Piffissami sivikitsumik Campus Kujalleq suliffigisimanngilat. Tamanna sumik pissuteqarpa?
”Aap, piffissami sivikitsumi Kommunemi atorfeqarpunga, kisianni inuusuttut maqaasivakka, Campus Kujallerlu ilinniartunut siunnersorsiortissarsiormat, soqutiginartikkakku misilikkusullugulu, qinnuteqarpunga. Taamani rektoriusoq allaffigalugu, aperaara, ilinniartitsisutut allatulluunniit ilinniagaqarnissaq piumasaqaatanersoq. Kaammattorlunga akivaanga, qinnuteqaqqullunga. Atorfik pivara, taamanikkullu tassa maani sulivunga.”
Aggustalu nangilluni oqarpoq:
”Ilinniartunik siunnersortitut sulininni, ullut suliffigisakka pissanganartorpassuaqarput. Inuusuttut GU-mi iliniartut apeqqutissarpassuaqartarput taamaattumillu aamma oqaloqateqarnissamik pisariaqartitsisarlutik. Marlunngornermi ullaakkut nalinginnaasumi, sunik suliaqarnissaq nalusarparput. Ullut suliffigisat tamarmik assigiinngitsuupput, sulinninni saaffiginninnerit qanoq ittunik suliassarfiunerat nalusarpara, saaffiginnissutit assigiinngitsorpassuusarmata.”
Ilinniartunik siunnersortaaneq Kommunemi sulinermit allaanerua?
”Aap, ilaatigut allaneruvoq; amerlasuutigulli aamma Inunnik isumaginnittoqarfimmi sulininni suliannut assinguffeqarsinnaalluni. Suliffinni taakkunani assigiinngitsuni assigiissutaasinnaasoq tassaavoq, saaffiginnittut inuunermi ingerlavimminni aqqutigisassaminnik toqqaaniarnerminni nalornissuteqarnertik pillugu, saaffginnittarnerat – ilaatigut siunissaq pillugu, oqaloqarteqarnissaq pisariaqartinneqartarluni. Isumaqarpunga, pisartut taamaattut peqataaffigisimaneri soqutiginartuusut pissanganartullu.”
Campus Kujallermiinnivit nalaani pissutsit allanngortut suusimappat?
“Ja, tassa – GUX-ip Niuernermillu ilinniarfiup kattunneqarnerisa kingunerivaat, suliffeqarferujussuup pilersinneqarnera. Tassa immikkoortortaqarfik ataasiinnaq sullikkunnaarparput, soorlu GUX imaluunniit NI. Maanna suleqatigiippugut tamatumalu malitsigaa, ilinniaqatigiiaat assigiinngisitaartorujussuanngornerat.”
Kalaallit Nunanni ilinniartitaanerup ineriartornera malinnaaffigisimavat. Tamanna pillugu, eqqarsaatit qanoq ittut eqqarsaatigisarsimavigit?
“Ja – taamaappoq. Qinersisoqartarnera soqutiginartuaannartarpoq, tamatigut nutaanik pisoqartarmat. Taamaappoq aamma kommunalpolitikkimut qinersisoqartarnera. Eqqaamavara, Qaqortumi Gymnasieqalernissaa pillugu, aalajangertoqarmat. Taamani aalajangiisoqannginnerani pilersitsinissaq pillugu, oqallisiginninnerujusssuaq pivoq.”
Campus Kujallermi sulininni Kalaallit qallunaallu kulturiannik oqaasiinillu sunnersimaneqartorujussuuvoq. Tamatuma ajoqutigisinnaasai pitsaaqutaalu pillugit, taasaqassaguit suut saqqummiukkusussavigit?
“Campus Kujallermi ilinniartut amerliartuinnavissut, qallunaatut oqaatsinik inorsarfeqartarput. Tamatumalu ilutigisanik tuluit oqaasii amerlasoorpassuarnit eqaannerusumik atorneqarleriartorlutik. Ukiuni 30-ni kingullerni ilinniartitsisut qallunaat meeqqat atuarfiini ilinniartitsisunngortartut ikiliartuinnavinnikuupput, tamatumalu kinguneraa inuusuttut kalaallisut oqaasillit qallunaat oqaasiinik ilikkartarnerat sunnigaasimammat. Inuusuttut, qallunaat oqaasiinik ilinniarnissaq eqqarsaatigalugu, piffissaq nukiillu allarpassuarnut atorsinnaavaat – taamaattumik amerlanerusunik periarfissaqarneq pitsaasuuvoq.”
Naggataatigut Aggusta aperaarput, siunissami ilinniartunngortussat qanoq siunnersorusunnerai aammalu soraarninngornermini siunissaq pillugu, qanoq pilersaaruteqarnersoq.
“Isumaqarpunga, inuusuttut inuunertik suniarnertillu pillugu, eqqarsaateqartaraqartut aammalu taakku pillugit, ilaquttatik oqaloqatigisassagaat. Immaqa ilaat igasunngorusunnerupput imaluunniit elektrikeri, ilaat GUX aqqutissamissut toqqarsinnaavaat. Suna tulluarnerusoq sunalu aqqutigerusunnarnerunersoq assigiinngitsorujussuupput – tamannalu pillugu qanoq eqqarsaateqarneq, ilaquttat oqaloqatigisarnissaat pingaaruteqartorujussuuvoq.
Soraarninngoruma, sinerujussuartassaanga. Nuannarisannik suliassaanga, assassortassaanga; aammalu imminut ikiornissaq pillugu, suleqatigiinnik aallartitsillunga. Inoqarpoq kiserliortunik imaluunniit peqqissutsikkut ajornartorsiutteqartunik – imaluunniit assassortartoqatigiinnik pilersitsissaanga.
Siullermilli sapaatit akunnerini siullerni qasuerseqqaarallassaanga.”
Aggusta – qujanarsuaq Campus Kujallermi sulisimaninnut. Pisuni mikisuni angisuunilu sulilluartarsimavutit. Campus Kujalliup ajunngistunik tamanik kissaappaatit!
Overvejer du at søge ind på GUX Qaqortoq? Læs mere her!