Hospitality / Inoroorsaarneq

Nuuk 22. – 23. august 2022

(Pikkorissarneq kalaallisut qallunaatullu ingerlanneqassooq)

(Kingusinnerpaamik nalunaarfissaq 15. august 2022)

Kikkulluunniit kiffartuussinermik suliallit uani pikkorissarnermi peqataasinnaapput. Pitsaasumik kiffartuusineq pingaaruteqaqaaq. Sullitat tassaasinnaapput takornarissat, suleqatit nunaqqatillu.

Sammineqartussat:

  • Inuppalaarneq (Hospitality)
  • Suliffimmi/Suleqatigiinni pissuserissaarneq
  • Neriulluarniarneq
  • Paasiniaajuarneq
  • Inuup allap inissisimaffianut inississinnaaneq
  • Innarligassaannginneq

Peqataasussat

Nuummi innuttaasut. Qinnuteqartut ilinniagaqanngitsut salliutinneqassapput. Ilinniagallit inissaqarpat pikkorissarnermi peqataasinnaapput.

Pikkorissarnermut akiliutissaq

Pikkorissarneq akeqanngilaq.

Pikkorissaanermi piffissaq sumiiffissarlu

Pikkorissaaneq Hotel Hans Egede-mi ingerlanneqassooq ulluni 22. – 23. august 2022 nal. 8.00 – 16.00

Peqataaniarnermi nalunaarfissaq kingullerpaaq

15. august 2022

Una toorlugu qinnuteqarit.

Angalanermut ineqarnermullu aningaasartuutit

Qinnuteqartut ilinniagaqannitsut akuerisaasut Nuup avataani (Kommuneqarfik Sermersuumi) najugaqarunik angalanerat, ineqarnerat nerisaqarnerallu PKU-nit akilerneqarsinnaapput.

Pikkorissarnermi ajunngitsorsiassat (kursusgodtgørelse)

Peqataasut ilinniagaqanngitsut pikkorissarnermi ajunngitsorsisinnaapput.

Peqataasut ilinniagallit peqataasinnaapput akeqanngitsumik, taakkuli ajunngitsorsiassaqanngillat.

Sulisitsisut / peqataasut suliffillit

Pikkorissartussaq pikkorissariaqquneqarnerup nalaani suliffeqaruni, taava Campus Kujalliup sulisitsisoq qinnuigaa pikkorissartup akissarsiani tigummiinnassagai.

Sulisitsisoq Campus Kujallermut akiligassamik nassiussisinnaavoq pikkorissarneq naammassippat. Ilisimatitsissutigineqassooq ullut peqataaffiit kisiisa akissarsissutigineqarsinnaammata.

Pikkorissarnermi suliffimmit akissarsiat tigummiinnanngikkaani ajunngitsorsiassanik pisoqarsinnaavoq.

Majoriaq / peqataasut suliffeqanngitsut, aalisartut/piniartut

Majoriaq suliffeqanngitsunut “sulisitsisutut” inissisimasinnaavoq. Taamaappat Campus Kujalliup pikkorissartup ajunngitsorsiassai Majoriamut tunniutissavai pikkorissartorlu Majoriamit ajunngitsorsiassani tigussavai. Majoriaq aamma Campus Kujalleq akunnerminni akiligassaq isumagissavaat.

Ajunngitsorsiassat ullut 14-ikkaarluni akissarsititsinermi ilaapput.

Pikkorissartut suliffeqanngitsut, pikkorissarnerullu nalaani suliffeqanngikkallarnermi pisortanit ikiorsiissutinik pisartagallit, pisartagartik tigummiinnassavaat, imaappoq ajunngitsorsiassat (kursusgodtgørelse) atuutissanngillat.

Pikkorissartoq aalisartuuguni / piniartuuguni ajunngitsorsiassaqarsinnaavoq (kursusgodtgørelse), taakku ulluni pikkorissarfiusuni isertitassaagaluanik annaasaqarnermut matussusiisussaapput.

Nammineq inuussutissarsiortut

Ajunngitsorsiassat isertitatut B-tut tunniunneqassapput. Taamaattumik pikkorssartup nammineq skat-eernissani isumagissavaa.

Ajunngitsorsiassat tunniunneqassapput pikkorissarsimasoq akiligassamik (faktura) Campus Kujallermut nassiussereerpat.

Ajunngitsorsiassap annertussusaa:

Juni 2019-imiit atuutilersut:

  • Ilinniagaqanngitsut 25-iniit akiullit: Ullormut 650 kr.
  • Ilinniagaqanngitsut 18 – 24-inut ukiullit: Ullormut 211,50 kr.