Ilinniagaq niuernermut aningaasaqarnermullu sammisoq
Ilinniakkap kisitsisaa 110030
Ilinnut aningaasaqarnermik, niuernermik nunallu tamat akornanni pissutsinik soqutigisaqartumut. Immaqa inuutissarsiutini sulinissat kissaatigaat imaluunniit aningaasaqarnermik, inatsisilerinermik, oqaatsinik allanilluunniit ilinniaqqikkusullutit.
Ukua suliarisinnaavatit:
- suliffeqarfiit aningaasaqarnerat
- tuniniaaneq
- nunat tamat akornanni aningaasaqarneq
- inuussutissarsiutit pillugit inatsisilerineq
- taakku saniatigut tuluttoorneq kisitsinerluunniit qaffasissusermi qaffasinnerpaami ingerlatissallugit toqqarsinnaavatit, taamaalillutik ingerlaqqilluni ilinniarfiit amerlanerit ilinnut ammassapput.
Niuernermi aningaasaqarnermilu ilinniakkat sammivii marluk pingasulluunniit pilersissavagut, tuluttoorneq aningaasalerinerlu assigiinngitsunik pingaartillugit. Sammivimmi ataatsimi qaffasissuseq A-mik tuluttoorneq aappaanilu qaffasissuseq A-mik kisitsineq pingajuannilu qaffasissuseq A-mik toqqaanissaq periarfissaqassaaq, tassa tuluttoorneq kisitsinerlu ukiut aappaanni qaffasissuseq B-mik naammassissammata.
Ilinniagaq niuernermut aningaasaqarnermullu sammisoq, ilinniakkamut siornatigut HHX-imik taaguuteqartinneqarsimasumut assingusorujussuuvoq. HHX assigalugu ilinniagaq niuernermut aningaasaqarnermullu sammisoq sineriammit tamanit qinnuteqarfigineqarsinnaavoq.